أصعب ألم ف حياتى ..

شوية ذكريات هسترسلها وهتكلم عن اصعب ألم ف حياتى ..

ألم جسمانى يعنى ..

انا كنت ف مدرسة عسكرية ف ثانوى .. نظام بقى مقدم من الجيش اسمه قائد المدرسة وده لطاته كل حاجة تقريباً .. إدارياً وخارج النظام العسكرى المدرسة فيها مدير عام وتحتيه 3 نظار .. واحد من النظار دول كان معرفة قريبة لأبويا .. راجل إسمه جمال لوقا عزيز .. الراجل ده كنت كل حين وآخر بروحله عشان يدينى تصاريح خروج من المدرسة وكان ساعات يزبطنى وساعات يرخم .. المهم ..

مرة بعد اول حصة حست بالم صعب شوية ف ودانى .. بعد تانى حصة الالم زاد بشكل كبير .. حسيت كمان انى توازنى مختل زى المساطيل او اللى شاربين حاجة .. المهم حسيت بعديها ان مش هينفع اكمل .. عندنا ف المدرسة فيه نظام غياب صعب جداً لو محضرتش حصة أكنك مجتش اصلاً .. المهم الواحد طبعاً كان بيروح المدرسة عشان الغياب بس طبعاً .. العلم لا يكيل بالبتنجان ..

المهم إستخصرت اليوم ف قولت يزبطنى بتصريح اروح اديله لأشهر شخصية ف المدرسة .. الراجل اللى ماسك الغياب .. كان إسمه حمدان وكان راجل عسل .. بساندوتشين طعمية يشطبلك غياب شهر ..

المهم روحت لجمال لوقا ده وقلتله انى خلاص مفيص .. افتكرنى بستهبل وقالى طب بص تعلالى بعد الرابعة .. روحت قولتله رابعة .. الف شكر يا استاذ ..

خدت بعضى وتنى ماشى طبعاً لإنى لو كنت قعدت للرابعة كنت هروح على نقالة .. المدرسة عندنا فيه باب للإدارة ده مبيقفلش غير نار بس نظام لو راجل امشى .. الغياب المشكلة الاكبر .. روحت ماشى من عند جمال ده ومروح علطول .. وانا ماشى والله كنت كذا مرة هقع والالم كان بقى بشع .. وصلت البيت بمعجزة وباخر ما عندى فتحت الباب ودخلت اخويا استغرب لإنى مبرجعش بدرى حتى لو خدت تصريح كنت ساعتها من نوعية العيال اللى لما انا وصحابى ناخد تصاريح ولا ناخد انصراف يعنى حصصنا تخلص نقوم نروح على محل بلاى استيشن ونقعد نلعب بالساعات لحد معاد خروجنا العادى ونروح ومحدش يعرف كنا فين .. المهم اخويا شافنى جاى بدرى بيقولى مالك قولتله هموت ودانى هتنفجر سكاكين بتقطع فيها .. المهم كان الالم زاد اكتر وكنت وصلت لمرحلة الصراخ .. اخويا الكبير ده مكانش اصلا حد ف البيت غيره اللى ف المعهد واللى ف الشغل .. ابويا وامى يعنى ..المهم راح واخدنى وعلى اقرب مستشفى وكانت مستشفى اميرى .. حكومى يعنى .. المهم لما وصلت للمستشفى بيكلم الممرضة ف بتقوله ده فين قالها ف الثانوية العسكرية .. طب معاه كارنيه .. انا مبهتمش بإنى أطلع الكلام الفارغ ده .. طيب مفيش اى حاجة قالى معاك بطاقتك قولتله ناسيها ف البيت .. المهم الست قالتله طب معلش مش هينفع نستقبله .. اخويا اتجن بعد الجملة دى وبهدلها زعيق .. يعنى واحد شغال يصرخ قدامك وإنتى بتقولى مش هينفع عشان مش معاه كارنيه .. راحت كلمت دكتور ف قالها تاخد بطاقة اخويا .. إدهالها وبعدين جت حطت بتاع طويلة كده ف ودانى عرفت إنه مهدىء بعدين قالوله معندهمش الادوات اللى تخلينى اهدى اكتر من ساعتين عمر المهدىء ويستحسن اروح لمستشفى ولا عيادة دكتور .. اخويا كلم ابويا وامى المهم رجعو وطلعنا على عيادة اخصائى أنف وأذن وكشف عليا وطلع عندى التهاب شديد ف الاذن الوسطى وعرفت ساعتها ليه انا كنت مش عارف امشى وتوازنى مختل .. اول مرة اعرف ان الاذن الوسطى بتتحكم ف التوازن للدرجة دى .. المهم عملت عملية بسيطة وقعد كل شوية يحطو خوابير كبيرة ف ودانى على مدار تلات تيام كل شوية يشيلو ويحطو .. مكنتش اعرف ان ودانى واسعة بالشكل الغبى ده .. كام يوم وخفيت بسرعة يمكن اسرع من الانفلونزا بس المشكلة ف مش ف فترة المرض ف صعوبته .. والله ربنا ما يكتبها على حد ..مش عارف ليه انا طقت ف دماغى اكتب الموضوع الغريب ده بس اهو كتبته وخلاص ..